• Musikenek London Sinfonietta hartuko du aste honetan, mundu mailako musika garaikideko talde garrantzitsu eta ospetsuenetako bat.

London Sinfoniettak apirilaren 23, 24 eta 25ean egingo duen bisita, 2025/26 ikasturteko ensemble egoiliar gisa, Musika Garaikidea Sortzeko Arte Irakaskuntza Artistikoen Masterraren barruan kokatzen da.

Lankidetza hau masterraren oinarrizko ardatzetako bat da eta prestakuntza-esperientzia berezia eskaintzen die ikasleei: nazioarteko erreferentziako ensemble batekin zuzenean lan egitea, interprete horientzat berariaz pentsatutako obrak konposatzea eta sorkuntza-prozesu osoan bidelagun izatea, kontzertuko estreinaldiraino.

Proiektua hiru topaketatan garatzen da ikasturtean zehar. Lehen fasean, ikasleek beren proposamenak aurkezten dituzte eta hasierako elkarrizketa bat izaten dute ensembleko musikariekin. Ondoren, ikasleak Londresera joan ziren ensemblearen egoitzara; bertan, lan-saioetan (work in progress) parte hartu zuten, beren konposizioak interpreteekin zuzeneko harremanean kontrastatu, doitu eta garatu ahal izateko.

Hirugarren eta azken topaketa aste honetakoa izango da Musikenen; hiru egunez entseguak, tailerrak eta masterclassak egingo dira Sorkuntza eta Interpretazioko ikasleekin. Prozesu honi amaiera emateko, kontzertua egingo da apirilaren 25ean, larunbata, 19:00etan, Musikeneko Auditorioan, eta bertan ikasleek konposatutako lanak estreinatuko dira. Aurretik, 18:00etan, jendearentzat irekitako mahai-ingurua egingo da ensembleko kideekin.

Ensemble egoiliarraren irudiak —2019-2020 ikasturtean masterra sortu zenetik Musikenen ezarria— konposizioaren eta interpretazioaren arteko etengabeko elkarrizketan oinarritutako ikaskuntza-eredua artikulatzea ahalbidetzen du, ikasleak jardun profesionalera eta musika garaikidearen nazioarteko testuingurura hurbilduz.

2026-2027 ikasturterako Musika Garaikidea Sortzeko Masterrean izena emateko epea zabalik dago. Datorren ikasturteko ensemble egoiliarra Ensemble Recherche (Friburgo, Alemania) izango da, alor honetan Europako talderik ezagunenetako bat.