Jarrai Gaitzazu

Home  /  Gradu ondokoak  /  KLARINETE BAXUAN GRADUONDOKO IKASTAROA

KLARINETE BAXUAN GRADUONDOKO IKASTAROA

IRAKASLEA: ÁNGEL MOLINOS

Alcañizen (Teruel) jaioa, Angel Molinosek Musikene Euskal Herriko Goi Mailako Musika Ikastegian (Donostia), Sibelius Akademian (Helsinki) eta Codarts – University of the Arts (Rotterdam) ikastegietan ikasia da. Azken horretan klarinete baxuko espezialitateko masterra egin du, instrumentu horretan espezializazioa hasiz.

Bere errepertorioa obra klasikoetatik hasi eta gaur egungo musikara artekoa bada ere, urteetan zehar konpromiso sendoa hartu du musika garaikidearen sustapenarekin, eta, ondorioz, obra asko estreinatzeaz gain musikagileekin modu aktiboan aritu da elkarlanean obra horietako asko sortzeko.

2009tik Finlandian du bere jarduera artistikoaren ardatza, modu erregularrean agertzen delarik a solo emanaldietan zein ganbera-musikako kontzertuetan, herrialdeko orkestra eta ensemble nagusiekin aritzeaz gain, besteak beste Opera Nazionaleko Orkestra, Finlandiar Irratiko Orkestra Sinfonikoa eta Lahtiko Orkestra Sinfonikoa.

Gaur egun, Helsinkiko Sibelius Akademian klarinete baxuak musika garaikidean duen rolaren inguruko doktoretza artistikoa amaitzen ari da, eta bertan ikerlari laguntzaile eta klarinete baxuko irakasle gisa ere lan egin du.

2020tik klarinete baxuko irakasle da Musikenen.

Azalpena

Klarinete baxuan graduondoko ikastaro hau goi-mailako ikasketak amaitu ondoren klarinete baxuan espezializazio-maila handiagoa lortu nahi duten klarinetistei zuzendua dago. Aukera bikaina da alderdi tekniko espezifikoetan eta potentzial artistiko osoan sakontzeko, musika-testuinguru guztietan.

Ikastaroa lan-sistema eta errepertorio pertsonalizatu baten bidez egingo da, ikasle bakoitzaren interes artistiko eta behar berezietara egokitua, bai eta prestakuntza eta lan aldetik dituen asmo eta helburuetara ere. Ikastaro honek, beraz, ikuspegi ezberdinak izan ditzake:

  • Klarinete baxuak orkestran duen rolean eta orkestra-entzunaldien prestaketan sakontzea, klarinete baxurako pasarte adierazgarrienak (sinfonia eta opera errepertorioa) eta orkestra entzunaldien atariko probetan agertu ohi diren obrak landuz.
  • Klarinete baxua bakarkako instrumentu gisa hobeto ezagutzea, bai bakarkako obrekin, bai ganbera musikarekin. Errepertorioa ikaslearekin adostuko da, eta instrumentuarentzat tradizionalena den literaturatik hasi eta musika sorkuntza garaikiderainoko ibilbidean elektronikadun obretara, beste arte diziplina batzuk barne hartzen dituzten obretara eta abarretara iritsi ahal izango da.

Matrikulatutako pertsonek, ikastetxeak hala proposatuta, Musikenek programatutako jarduera instrumentaletan edo hitzarmena duten beste musika-talde batzuekin lankidetzan egiten direnetan kolaboratzaile gisa parte hartu ahal izango dute euren borondatez

Egutegia

Egitasmoak 20 eskola ordu izango ditu, bakarkakoak, eta ordutegia eta urteko antolaketa irakasleak eta ikasleak adostuko dute, kasu zehatz bakoitzean lehentasunak eta aukerak kontutan hartuz.

Eskola ordu eta norberak gutxi gora behera egin beharreko ordu kopurua

  • Eskola ordu kopurua (banakako eskolak): 20
  • Norberak ikasten eman beharreko orduak gutxi gora behera: 150

Prezioa: 2650€

X