Aurreskua gizonezkoen dantza izan al da historikoki? Tradizioan emakumeek dantzatu al dute aurreskurik? Ehun urtez indarrean izan den ikuspegi faltsu batek ukatu egiten zuen emakumeek aurreskua dantzatzen zutenik, baina gaur badakigu historian ere emakumeek dantzatu dutela aurreskua.

Euskal dantzan zenbait belaunalditan nesken eta mutilen dantzak bereizi izan ditugu. Eta nesken jantziak eta mutilen jantziak. Dantza egiteko moduak ere bereizi izan ditugu: mutil moduan dantzatu; neska moduan dantzatu. Baina nondik dator bereizketa hori? “Beti” izan dira nesken eta mutilen dantzak, janzkerak eta dantzakerak? Eta ez bada betidanikoa, noiztik eta zergatik banatzen dira euskal dantzak horrela? Euskal dantzetan emakumeak eta gizonezkoen rol estereotipatuak (janzkera, errepertorio eta dantzakera bereiziak) noiz eta nola eraiki ziren aztertuko dugu.

Dantzan elkartea euskal dantzaren sustapenean eta dibulgazioan aritzen den elkartea da, euskal dantzazaleek sortuta 2001. urtean eta euskal dantzaren dokumentazioan, ikerketan, sustapenean, formazioan eta komunikazioan aritzen dena, bai dantzan.eus atariaren bidez, bai aurrez aurreko saioen bidez ere, besteak beste Dantzan Ikasi (dantzanikasi.com) programaren bidez.

Oier Araolaza dantzaria da, Eibarko Kezka eta Donostiako Argia dantzari taldeetan aritzen da gaur egun. Dantzan elkartearen zuzendaria da. Gizarte Komunikazioan doktorea, Antropologia eta Informazio Zientziak gradu-ikasketak egin ditu, Musikologian ikasketa aurreratuak eta Artearen eta Musikaren Historian ikertzaile nahikotasuna eskuratu du. Euskal dantza ikertzen du, bai ikuspegi historikotik, bai antropologiatik ere, eta hainbat artikulu eta lan argitaratu ditu dantzaren inguruan. Euskal dantza eta generoa ikertu ditu EHU/UPVren Mikel Laboa katedrarekin egindako doktore-tesian.